52. حضور اقدس (صلی اللہ علیہ وآلہ وسلم) کی عمر شریف کا ذکر

【1】

حضور اقدس ﷺ کی عمر شریف کا ذکر

حضرت ابن عباس (رض) فرماتے ہیں کہ حضور اقدس ﷺ نبوت کے بعد تیرہ برس مکہ مکرمہ میں رونق افروز رہے ان تیرہ برس میں حضور ﷺ پر وحی نازل ہوتی رہی اس کے بعد مکہ مکرمہ سے ہجرت فرمائی اور دس سال مدینہ منورہ میں قیام رہا اور تریسٹھ سال کی عمر میں وصال ہوا۔

【2】

حضور اقدس ﷺ کی عمر شریف کا ذکر

امیر معاویہ (رض) نے ایک مرتبہ خطبہ میں یہ فرمایا کہ حضور اکرم ﷺ کا وصال تریسٹھ سال کی عمر میں ہوا۔ حضرات شیخین یعنی حضرت ابوبکر صدیق اور حضرت عمر (رض) کا وصال بھی تریسٹھ سال کی عمر میں ہوا میری بھی اس وقت تریسٹھ سال کی عمر ہے۔

【3】

حضور اقدس ﷺ کی عمر شریف کا ذکر

حضرت عائشہ (رض) سے بھی یہی مروی ہے کہ حضور اکرم ﷺ کا وصال تریسٹھ سال کی عمر میں ہوا۔

【4】

حضور اقدس ﷺ کی عمر شریف کا ذکر

حضرت ابن عباس (رض) سے یہ منقول ہے کہ حضور اکرم ﷺ کا وصال پینسٹھ سال کی عمر میں ہوا۔

【5】

حضور اقدس ﷺ کی عمر شریف کا ذکر

دغفل بن حنظلہ سدوسی سے بھی یہی روایت ہے کہ حضور اقدس ﷺ کا وصال پینسٹھ سال کی عمر میں ہوا۔

【6】

حضور اقدس ﷺ کی عمر شریف کا ذکر

حضرت انس (رض) فرماتے ہیں کہ حضور اقدس ﷺ نہ زیادہ لمبے قد کے تھے نہ پستہ قد نیز رنگ کے لحاظ سے بالکل سفید تھے نہ بالکل گندمی رنگ، آپ ﷺ کے بال مبارک نہ بالکل پیچیدہ تھے نہ بالکل سیدھے (بلکہ ہلکی ہلکی سی پیچیدگی اور گھونگریالہ پن لئے ہوئے) چالیس سال کی عمر میں آپ ﷺ کو نبوت ملی اس کے بعد دس سال حضور اکرم ﷺ نے مکہ مکرمہ میں قیام فرمایا اور دس سال مدینہ منورہ میں ساٹھ سال کی عمر میں حضور اکرم ﷺ کا وصال ہوا۔ اس وقت آپ ﷺ کے سر مبارک اور داڑھی شریف میں تقریبا بیس بال بھی سفید نہیں ہوں گے۔